Heat, Sixers nagpabiling wa'y pilde sa ilang korte

CEBU, Philippines — Gipayaka sa Miami Heat ug Philadelphia 76ers ang tagsa-tagsa nila ka mga kontra aron pagpabiling wa'y pilde didto sa ilang korte ning NBA season.

Didto sa American Airline Arena, sila si Jimmy Butler ug Bam Adebayo parehong mikadlit og triple-double sa dihang gilat-an sa Heat ng Atlanta Hawks sa iskor nga 135-121.

Si Adebayo miiskor og career high 30 puntos uban ang 11 ka rebounds ug 11 ka assists, samtang si Butler mitimbre og 20 puntos, 18 ka rebounds ug 10 ka assists alang sa Heat nga 11-0 na karon didto sa ilang balwarte.

Dako sab og natampo sa Heat sila si rookies Kenrick Nunn ug Duncan Robinson nga pulos mirehistro og career-high sa pinuntosay. Si Nunn mikadlit og 36 puntos, samtang si Robinson miposa og 10 ka tres sa iyang 34 puntos. 

Sa Wells Fargo Center, ang 76ers nagpabilin sab nga perpekto didto sa ilang tugkaran human gipukan ang Denver Nuggets, 97-92.

Si Joel Embiid mihipos og 22 puntos apil na ang duha ka free throws sa nahibiling 15.3 segundos nga maoy nagsilyo sa ika-13 nga sagunson daog sa Sixers didto sa ilang homecourt. Mihimo sab si Embiid og 10 ka rebounds ug unom ka assists sa iyang estatistika.

Sa laing duwa, si Damian Lillard mikamada og 31 puntos ug si Hassan Whiteside miamot og 17 puntos ug 15 ka rebounds sa dihang gilubong sa Portland Trail Blazers ang nagkagidlay nga New York Knicks, 115-87.

Didto sa Charlotte, si Devonte Graham mitali og 29 puntos aron pangulohan ang Hornets ngadto sa 114-107 nga kadaogan batok sa Washington Wizards.