Gilas ni Cone mas lig-on
CEBU, Philippines – Gitandi ni Indonesian coach ug kanhi Gilas mentor Rajko Toroman ang Gilas Pilipinas nga gidala karon ni Tim Cone ug sa Gilas nga miduwa sa miaging World Cup didto sa China.
Si Toroman miingon nga mas lig-on ug mas hapsay ang sistema sa Gilas ubos ni Cone itandi sa Gilas nga miduwa niadtong Septiyembre pakyas pagkuha bisan usa lang ka daog.
Ang Gilas gidala ni NLEX Road Warriors coach Yeng Guiao nga mikanaog dayon sa puwesto human sa makauuwaw nilang kampanya sa World Cup.
Saksi si Toroman sa kadominante sa Gilas sa ilang sangka sa semis sa Southeast Asian Games diin gilubong sila sa iskor nga 97-70 niadtong Lunes sa gabii didto sa Mall of Asia Arena.
Bisan og walay naturalized player, si Toroman naglisud pagpadaog sa Indonesia tungod sa balanseng opensa ug solidong depensa sa Gilas.
Dako og respeto si Toroman ngadto ni Guiao. Apan si Toroman miangkon nga nagsalig ra si Guiao sa iyang naturalized import Andray Blatche sa miaging World Cup hinungdan nga mipalyar ilang game plan batok sa mga banggiitang koponan sa kalibotan.
Sa iyang nakita sa Gilas ni Cone, nahatagan og tagsa-tagsa ka mga papel ang iyang mga magduduwa.
- Latest