Casugay flag bearer sa closing ceremony
MANILA, Philippines — Hindi lamang ang gintong medalya at paghanga ng sambayanan ang napanalunan ni surfer Roger Casugay kundi ang karangalang maging flag bearer ng Team Philippines sa closing ceremonies ng 30th Southeast Asian Games bukas.
Ito ang inihayag ni Philippine Sports Commission chairman William ‘Butch’ Ramirez ukol sa ipinakitang kabayanihan at sakripisyo ng 25-anyos na si Casugay sa pagliligtas sa karibal na si Arip Nurhidayat ng Indonesia.
May naghihintay ding cash incentive kay Casugay mula sa sports agency, ayon kay Ramirez.
“I will include Roger in our awarding in Malacañang to meet the President. The PSC will give him a plaque of recognition for his heroic deed and a cash incentive to be approved by the PSC board, wika ni Ramirez sa isang statement.
Gagawin ang closing ceremonies ng biennial event sa New Clark City Stadium sa Capas, Tarlac.
Sinaklolohan ni Casugay ang Indon surfer matapos mapatid ang tali sa paa nito sa kanyang surfboard sa kanilang ikatlong qualifying round ni Casugay sa men’s longboard event sa San Juan, La Union.
Kamakalawa ay inangkin ni Casugay ang gold medal sa nasabing event laban sa kababayang si Rogelio Esquievel, Jr.
“These Games are not only about medals,” ani Ramirez. “It is about character, resilience, love for one another and shoring up the faith of the person next to you, something that Casugay has exemplified.”
- Latest
