Ancajas nakadepensa sa bakus
Apan Cebuano Marlo Tapales pakyas batok Hapon
CEBU, Philippines — Managlahi ang nadangatan sa duha ka Pinoyng boksidor nga sila si Jerwin “Pretty Boy” Ancajas ug Marlon “Nightmare” Tapales sa tagsa-tagsa nila ka misyon kagahapong adlawa.
Didto sa Puerto Rico, si Ancajas milampos pagdepensa sa iyang IBF super flyweight title sa ikawalong higayon human mirehistro og dominanteng kadaogan pinaagi sa 6th round TKO batok sa Chilean niining challenger nga si Miguel Gonzalez.
Si Ancajas (32-1-2, 22KOs) mibayo og kulata ni Gonzalez (31-3, 8KOs) sa ikaunom nga hugna hinungdan nga naaghat si reperi Wayne Hedgpeth pag-undang sa away aron paglikay sa Chilean ang peligrong kahimtang.
“I want to thank God for giving me the strength to win this fight and defend my title for an eighth time. I am happy to bring glory to my country, and I want to continue doing so for a long time,” matud pa ni Ancajas. “In 2020, I will be prepared for what my team and Top Rank have planned for me. I want to unify titles.”
Dili hinoon kalipay tanan ang natagamtaman sa mga Pinoy gumikan kay didto sa Barclays Center sa Brooklyn, New York, si Tapales (33-2, 16KOs) napakyas sa iyang tinguha nga mamahimong usa ka two-time world champion.
Kini human si Tapales gipalukapa ni Ryosuke Iwasa (26-3, 16KOs) sa Japan sa ika-11 nga hugna alang sa interim International Boxing Federation junior featherweight belt.
Usa ka makusog nga left hook ni Iwasa maoy nakatumba ni Tapales sa maong hugna. Misuway og barog si Tapales apan mibarag ug klarong nalipong niadtong puntoha.
Mao kini ang hinungdan nganong giundang ni reperi Shada Murdaugh ang away bisan og si Tapales mipalag sa iyang desisyon.
- Latest
