Rockets midaog gihapon bisan napugngan si Harden sa Raptors

CEBU, Philippines — Napugngan sa Toronto Raptors ang  NBA scoring leader nga si James Harden sa Houston, apan ang mga teammates niini misalida og maayo hinungdan nga gipakaging sa Rockets ang defending champion, 119-109 kagahapon didto sa Scotiabank Arena sa Toronto, Canada.

Si forward Ben McLemore maoy nangu sa Houston bitbit ang season-high 28 puntos, samtang si Russell Westbrook mi-ayag og triple-double  uban ang 19 puntos, 13 ka rebounds ug 11 ka assists alang sa Rockets nga daling nakabawi sa kontrobersiyal nilang kapildihan sud sa duha ka overtime batok sa San Antonio Spurs niadtong Miyerkules.

Si Harden nga mi-avarage og kapin 39.0 puntos matag duwa karon nga season, mikulit lamang og 23 puntos gumikan sa solidong depensa nga gihabol sa Raptors ngadto kaniya, apan wala kini nahimong babag sa dalan sa Rockets ngadto sa kalampusan.

Si Pascal Siakam dunay 24 puntos ug si Fred VanVleet miamot og 20 puntos alang sa Raptors nga nakapilde sa ikaduhang sunod-sunod nga higayon didto sa ilang korte.

Didto sa New Orleans, si Devin Booker miposte og 21 sa iyang season-high 44 puntos sa ikatulong kuwarter aron agakon ang Phoenix Suns sa 139-132 nga daog sud sa overtime batok sa Pelicans.

Sa Washington, ang Japanese rookie nga si Rui Hachimura miiskor og 27 ug si Bradley Beal mitimbre og 26 puntos sa dihang gipakuratan sa Wizards ang Philadelphia 76ers, 119-113.

Sa lain pang resulta, gipakauwawan sa Denver Nuggets ang New York Knicks, 129-92, didto sa Madison Square Garden.