Bro J Bakery giluwas ni dela Peña sa FYA Season 24

CEBU, Philippines – Nakaeskapo ang Bro J Bakery sa kulbahinam nga duwa batok sa Central Ice Cream/Nevaeh Sales Trading, 87-85 sa nagkainit nga aksiyon sa FYA Basketball Tournament (Season 24) Soontit Construction Inc. Cup 2019-2020 niadtong Martes diha sa Atillo gym sa Punta Princesa, Dakbayan sa Sugbo.

Nagda'g daog sa Bro J Bakery mao si Rio dela Peña human masud ang  mahinungdanon niyang itsa sa nahibiling dos segundos sa duwa. Siya sab ang responsabli paglaslas sa 20 puntos nga labaw sa Central Ice Cream/Nevaeh Sales Trading sa fourth quarter pinaagi sa duha niya ka krusyal nga 3-point shots ug laing duha ka baskets.

Mahatod unta sa Central Ice Cream/Nevaeh Sales Trading ang duwa ngadto sa overtime, apan wala makuwenta ang basket ni Dondon Miano kay patay na ang oras sa iyang pag-itsa.

Gawas sa mabayanihon niyang duwa hinungdan sa pagtahod kaniya isip best player of the game, si Dela Peña mao sab ang topscorer sa Bro J Bakery nga adunay 24 puntos, uban ang lima ka rebounds, unom ka assists ug duha ka steals.

Ikaduhang topscorer sa Bro J Bakery ni Junrey Arreglo mao si Justine Urot sa iyang 20 puntos, gisundan ni Van Anthony Ensong nga adunay 17 puntos ug Jeramie Flores nga miambit og 10 puntos.

Ang Bro J Bakery nahimutang karon sa ikalima sa standing uban ang 3-3 win-loss record.

Ang Central Ice Cream/Nevaeh Sales Trading nilang Jofel Tejada ug Noel Medalle, gipangulohan ni Kier dela Peña nga mibagnos og 27 puntos.

Sila si Jayson Enriquez, Emman Reubal ug Dodie de Gracia mitimbre sab og double figures sa Central Ice Cream/Nevaeh Sales Trading nga nalabay sa ikapitong dapit sa standing sa ilang 2-4 nga baraha.

Sa laing bahin, ang AVTES milansang sab sa ikatulo nilang daog human gibuntog ang Harold's Hotel, 87-80.

Sa gihapon, si Dexter Caballero mao na sab nahimong best player of the game human mikadlit og 21 puntos, walo ka rebounds, siyam ka assists ug tulo ka steals. 

Si Jade Ursal mitikdol og 15 puntos, samtang sila si Joel Baiño ug Jas Sydiongco parehong mitimang og 14 puntos sa AVTES nilang Allen Tulod ug Macky Macachor nga ikatulo na sa standing bitbit ang 3-3 nga baraha.

Upat sab ka players sa Harold's Hotel ni Arnel Trinidad ang mikulit og double figures nga gipangulohan ni Ava Flores sa iyang 24 puntos.

Silang Edgemar Jumantoc ug Ryan Dacayana miantog og 13 puntos matag, samtang si Niko Laborte mihirit og 10 puntos sa Harold's Hotel nga anaa karon sa ikaupat nga dapit sa ilang 3-3 win-loss record.

PUNTOS MATAG USA

Unang duwa:

AVTES  (87) – D.Caballero 21,  J. Ursal 15, J. Baiño 14, J. Sydiongco 14, R. Villaver 8, D. Tabares 6, W. Dacayana 5, B. Tabaña 2, R. Laput 2.

HAROLD'S HOTEL (80) – A. Flores 24, E. Jumantoc 13, R. Dacayana 13,N. Laborte 10, C. Arnado 9, J. Regudo 6, J. Cabañez 5.

Ikaduhang duwa:

BRO J BAKERY  (87) – R. Dela Peña 24,

J. Urot  20, V. Ensong 17,  

J. Flores 10,  R. Patalita 7, J. Noquillo  4, C. Laud 2, E. Noquillo 2.

CENTRAL ICE CREAM (85) – K. Peña 27, J. Enriquez 13, E. Reubal 11, D. De Gracia 10, D. Miano 6, T. Abella 6, J. Tejada  5, N. Medalle  4. T. Marata 2,  R. Tabares  1.