Sunday.Com 6th season sugdan sa Disyembre 22

CEBU, Philippines — Andam na ang tanan alang  sa   pagpahigayon sa   Sunday.com  6th Conference Basketball League nga gikatakdang sugdan karong Disyembre 22 diha sa Mandaue City Cultural and  Sports Complex.

Sa naandan, himuon ang tradisyonal nga parada sa mga partisipanteng koponan sugod sa alas-7 sa buntag ug isunod dayon ang mubo nga programa.

Molamas sa programa mao ang pagpili og best in uniform ug best muse.

Pito ka koponan ang magtigi sa kampiyonato nga pangulohan sa defending champion Bulldogs ni playing team manager Tata Nadera.

Ang laing unom ka koponan uban sa ilang team manager mao ang IMed ni Junaide Alidajao, Unisol ni John Paul Espija, New Bloods ni Neil Ibarita, Half Baked ni Ian Sampang, Yamaha ni Alfred Pasana ug 3Coins ni Ray Neiz.

Si Nadera nga mao sab ang ballclub president,  mipahibalo nga ang pito ka teams moduwa og single round robin format sa elimination diin ang top 4 teams moabante sa semifinals.

Ang team nga walay pilde sa unom ka duwa sa eliminasyon makabaton og 'twice-to-beat' advantage sa semis.

Ang mga mananaog maoy mag-ilog sa titulo, samtang ang mga pildero magsangka alang sa ikatulong puwesto.

Ang torneyo nga  natukod pinaagi sa mga paningkamot ni Nadera uban sa adviser nga si Atty. Sally Malig-on  magsubay og barangayan o barkadahan format aron ang tanang partisipante mahatagan og higayon nga makaduwa.