Thor Olshoppe, SPEAK midaog dayon sa Amicis caging

CEBU, Philippines — Gisubhan og daog sa Thor Olshoppe ug Team SPEAK ang labing unang Amicis Basketball League (ABL) human gipilde ang tagsa-tagsa nila ka mga kontra pagsugod sa liga niadtong Domingo didto sa Consolacion Sports Complex.

Sa 30-above category, si Cocoy Padin mikadlit og 24 puntos sa dihang gitagod sa Thor Olshoppe ang Jamal's Lechon, 95-57.

Laing upat ka players ang mitali og double figures sa Thor Olshoppe ni coach/team owner Melvin Cataluña mao sila si  Jorge Ermac sa iyang 16 puntos,  Neil Siacor  nga aduna 14 puntos. Sila si Philip Recto ug Larry Bregente mitali og 10 puntos matag usa alang sa Thor Olshoppe nga wala na molingi pa sukad miabante og 18 puntos sa halftime, 39-21.

Si Ricky Rubio maoy nangu sa Jamal's Lechon uban ang 14 puntos, samtang sila si Mark Cuer ug Joseph Pepito parehong mipupo og 12 puntos sa pilderong  koponan.

Sa laing aksiyon, si Joemar Batiquin mibahog og 25 puntos, pito ka assists, upat ka steals ug tulo ka rebounds aron pangulohan ang SPEAK ngadto sa 111-50 nga demolisyon sa SFG sa 29-under division.

Miamot si Jojo Pedrano og 22 puntos, si Kent Aragon mitali og 14, puntos, samtang sila si Lester Cañete, McLister Gica ug Sealtel Yap nagkumboya'g 34 puntos sa SPEAK ni coach ug team owner Ryan Perez.

Sila si Chris Uy ug Mark Monterola nagkumbinar og 25 puntos sa SFG.