Central Ice Cream/Nevaeh Sales Trading daog

CEBU, Philippines —  Upat ka players ang mipugnit og double figures alang sa Central Ice Cream/Nevaeh Sales Trading nga midaog batok sa AVTES, 77-67 sa FYA Basketball League (Season 24) Soontit Construction Cup 2019-2020 niadtong Domingo didto sa Atillo gym sa Punta Princesa, Dakbayan sa Sugbo.

Gipangulohan kini ni Dodie De Gracia nga mirehistro og 16 puntos nga gipalamanan og 12 ka rebounds, upat ka assists ug lima ka block shots nga igo na kaayo aron pasidunggan isip best player of the game.  Si Kier dela Peña miamot og 14 puntos, samtang sila si Emman Reubal ug Junard Angkos mitampo'g 12 ug 10 puntos sa Central Ice Cream/Nevaeh Sales Trading maoy pirmeng naggukod sa unang tulo ka kuwarter.

Sa gilauman, si Dexter Caballero mao gihapon ang nangu sa AVTES nga mibugha og 21 puntos, gisundan ni Ryan Villaver sa iyang 10 puntos.

Ang Central Ice Cream/Nevaeh Sales Trading nilang Jofel Tejada ug Noel Medalle ug ang AVTES nilang Allen Tulod ug Macky Macachor pareho karong nagbitbit og 2-3 records.

Sa laing bahin, wala pa mapul-i'g pamupo og daog dihang ilang gilubong ang Masterline, 103-87.

Nagmangtas og maayo si Janry Stella  diin mibagdok kini og 32 puntos aron pangulohan ang Purefit Gym nga mialsa na og 5-0 nga baraha.  Aduna sab siya'y duha ka rebounds ug tulo ka assists aron tahuron nga  best player of the game.

Ang team manager nga si Mclain Alkuino miabuno'g 21 puntos, samtang si Kent Pepino mitampo'g 12 puntos sa Purefit Gym nga dominante kaayo sa tibuok duwa.

Ang Masterline ni Noel Medalle gipangulohan ni Stephen Lumagbas nga milansang og 25 puntos, gisundan ni Socrates Aglipa nga adunay 22 puntos ug Dandan Bucado sa iyang 19 puntos. 

Samtang sila si Giovanni Tandoy ug Rammel Perami nagkumboya'g 22 puntos sa 2-3 nga Masterline.

PUNTOS MATAG USA

Unang duwa:

CENTRAL ICE CREAM (77) – D. De Gracia 16, K. Dela Peña 14, E. Reubal 12, J. Angkos 10, J. Enriquez 9, D. Miano 8, T. Marata 4, J. Tejada 2, M. Ancla 2.

AVTES (67) – D. Caballero 21, R. Villaver 10, J. Ursal 9, J. Sydiongco 8, D. Tabares 7, J. Baiño 6, B. Tabaña 4, W. Dacayana 2.

Ikaduhang duwa:

PUREFIT GYM (103) – J. Stella 32, M. Alkuino 21, K. Pepino 12, W. Gabucan 8, V. Ramirez 7, G. Aguilar 6, A. Dante 5, A. Montillero 4, J. Rara 4, K. Cabreros 2, T. Santillan 2.

MASTERLINE (87) – S. Lumagbas 25,  S. Aglipa 22, D. Bucado 19, G. Tandoy 11, R. Perami 10.