Cokaliong run 2019 Chepsiror, Sorongon daog

CEBU, Philippines — Ang Kenyan nga si Eric Chepsiror ug ang Cebu-based long distance runner nga si Ruffa Sorongon gikan sa Sultan Kudarat maoy milugwa nga labing paspas sa tagsa-tagsa nila ka dibisyon sa Cokaliong Run 2019:Full Speed at 30 kagahapon diha sa City-Cebu Northwing parking area.

Si Chepsiror maoy miposte sa labing paspas nga oras aron langkaton ang 21K men’s open title sud sa usa ka oras, nuybe minutos ug 40 segundos. Labaw lamang siya og 11 segundos ni Prince Joy Lee, ang Cebu leg champion sa National Milo Marathon nga mipahiluna sa ikaduhang dapit sa oras nga 1:09:51. Si Florendo Lapiz maoy nalandig sa ikatulong dapit sa oras nga 1:15:23.

Sa women’s division, si Sorongon maoy gikoronahang hara human mipatak sa labing nindot nga oras nga 1:32:31. Nagsunod kaniya si Eva Marie Villarin (1:33:45) samtang si Kay Cundangan maoy na-3rd sa oras nga 1:49:50.

Mikuha sab og atensiyon si Jerome Casinillo human naghari sa men’s 12K sa oras nga 41 minutos ug 36 segundos. Sila si Azlan Pagay (43:36) ug Jiboy Magbologtong (44.34) maoy miangkon sa sunod nga duha ka puwesto.

Sa women’s 12K, si Cherry Andrin mirehistro og 55 minutos ug 43 segundos aron pagsakmit sa titulo samtang sila si Gelma Monsanto (1:00:03) ug Virgita Soco (1:07:55) maoy mipatong sa ikaduha ug ikatulong dapit.

Sa 5K, ang top 3 mao sila si Ariel Saballa (17:17), Ryan King (17:30) ug Han Renald Desamparado (17:50) sa men’s class ug sila si Asia Paraasi (19:51), Princess Jive Bornea (20:19) ug Lorence Ivory Garcia (22:48) sa women’s category.