P60T ganti sa Danao Mayor Durano chess

CEBU, Philippines — Kapin sa P60,000 nga ganting salapi ang iapud-apud sa mga mananaog sa 4th Mayor Ramon Durano III FIDE-rated Rapid Chess Tournament nga gikatakda karong Disiembre 15 didto sa Cebu Technological University (CTU)-Danao Campus sa Sabang, Danao City.

Mga kategoriya nga kumbatihan mao ang open, Danawanon, ug kiddies Under 15.

Apil sa mga dekalibreng players nga mopakitag aksiyon mao sila si International Master Kim Steven Yap,  FIDE Master Anthony Makinano, Ronald Ganzon, ug Richard Nativad.

Mosalmot sab sila si Norman Longjas, Glicerio Padilla ug Genesis Apog sa Bohol, Diego ug Jethro Caparino sa Mandaue City, Bonn Rainuld Tibod sa Toledo City, Brylle Arellano ug Allan Pason sa Lapu-Lapu City, ug mga magduduwa og ahedres sa Naga City nga gipangulohan ni CESCA President Dennis Albiso.

Gawas sa mga tropeyo ug medalya, ang makampiyon sa open category mobulsa og P10,000 samtang ang mopahiluna sa ikaduha ngadto sa ikalimang dapit makadawat og P8,000, P7,000, P5,000 ug P3,000.

Ang top 5 mokabi og P5,000, P3,500, P2,000, P1,000 ug P750 sa Danawanon division ug P2,000, P1,500, P1,000, P750 ug P500 sa Under 15 age group.

Ang rehistrasyon nagkantidad og P50 sa kiddies, P100 sar Danawanon ug P200 sae open.

Alang sa dugang detalye, kadtong mga interesado mahimong motawag nilang Edgar Martel sa 0933-4560411 o 0917-6525354 ug Gamaliel Gonzales sa 0933-6231656.

Giorganisa sa Danao Chess Club, ang tinuig nga torneyo hugtanong gipaluyohan sa Danao LGU ubos sa pagtimon ni Mayor Ramon Durano III, vice mayor Thomas Mark Durano, Jed Almendras ug tanang mga konsehal sa dakbayan.(Emmanuel B. Villaruel)

4 teams buhi pa sa NBTC-South Cebu leg

Upat na lang ka teams ang nagpabiling buhi ug dunay puruhan nga molabni sa gihandum nga titulo sa Southern Cebu leg sa Chooks-to-Go SM National Basketball Training Center (NBTC) League niadtong weekend didto sa Sisters of Mary School-Boystown sa Tungkop, Minglanilla.

Gipakyaw og daog sa host SMS-Boystown ang katapusan nilang duha ka duwa sa quarterfinal round aron pag-abante sa semis uban sa University of the Visayas (UV)-Minglanilla Campus, Lipata National High School, ug Pinamungajan NHS-Batang Ungas.

Gimasaker sa Boystown Aloysians ang St. Cecilia’s College, 84-35, ug dayon gipatikalbong ang UV-Minglanilla, 84-53.

Napikas ang duha ka duwa sa Pinamungajan, Lipata ug UV-Minglanilla apan nakamaneho gihapon sila pagtaak sa Final 4.

Ang Pinamungajan nag-agi usa og overtime sa wala pa pioga ang Lipata, 66-58, apan miyukbo sila sa Tulay NHS, 49-55, samtang ang Lipata dali nga namawi pinaagi sa pagpakaging sa Talisay City NHS, 74-53.

Ang UV-Minglanilla nakaipsot bnatok sa Immaculate Heart of Mary Academy (IHMA), 42-39, apan nasugamak sa mga kamot sa Aloysians.

Sa crossover semifinals, ang UV-Minglanilla makigharong sa Lipata NHS, samtang ang SMS-Boystown makigtihe sa Pinamungajan NHS. Ang mga mananaog maoy magsangka sa korona sa usa ka knockout match.

Ang makampiyon sa torneyo nga gipaluyohan sa SM, Chooks-to-Go, Vivo, Smart, Darlington-Exped, SBP,Phoenix, Go for Gold, Molten, Gatorade, ESPN5, ug Cignal maoy morepresentar sa Southern Cebu sa SM NBTC League Regional Finals sunod tuig didto sa Bohol.