Spurs mipakugang sa L.A. Clippers
CEBU, Philippines — Si Kawhi Leonard maoy nangu sa tanang scorers uban ang 19 puntos sa ikaduha niyang duwa balik didto sa San Antonio, apan dili kini igo gumikan kay gipilde sa Spurs ang Los Angeles Clippers, 107-97 sa NBA kagahapon didto sa AT&T Center.
Ang two-time Finals MVP nga si Leonard, kinsa mitapon sa Clippers human giyahi ang Toronto Raptors ngadto sa makasaysayanon niining NBA title sa miaging season, mitali og 13 puntos sa first half, apan wala na kini kaugpo sa nahibiling duha ka kuwarter sa aksiyon.
Sila si Derrick White ug LaMarcus Aldridge parehong mikolekta og 17 puntos, samtang si DeMar DeRozan miamot og 15 puntos sa Spurs nga napilde ka-10 sa miagi nilang 11 ka duwa sa wala pa makig-atbang sa Clippers.
Si JaMychal Green mikamada og 16 puntos sa Clippers, apan sama ni Leonard naminghoy sab gumikan kay naputol ang pito nila ka sagunson nga daog.
Sa laing resulta, si Norman Powell mitala og 19 sa iyang career-high 33 puntos sa ikatulong kuwarter sa dihang ang Raptors nakabangon human malubong og 11 puntos aron pakgangon ang Orlando Magic, 90-83.
Si Fred VanVleet miamot og 22 puntos ug si Pascal Siakam midonar og 10 puntos ug 13 ka rebounds alang sa Raptors nga miinat sa sunod-sunod nilang daog ngadto sa unom.
Didto sa Phoenix, si Luka Doncic mitabla sa iyang career-high 42 puntos sa dihang ang Dallas Mavericks mipilde sa Phoenix Suns, 120-113.
- Latest