Labing unang Amicis Basketball League mosikad na
CEBU, Philippines — Ang labing unang season sa Amicis Basketball League mosikad na karong adlawa didto sa Consolacion Sports Complex.
Sa dili pa ang kumbati sa korte, usa ka simpleng seremonyas sa pagbukas ang ipahigayon sugod sa alas-10 sa buntag nga pagatambungan nilang Consolacion Mayor Joannes 'Joyjoy' P. Alegado, Sangguniang Kabataan (SK) Federation President Carlos Donn Flores, ug ang consultant sa sports ug barangay affairs sa maong lungsod nga si Paul Alelu Flores.
Mosunod dayon ang mga duwa. Ang iskedyul masayran pinaagi sa drawing of lots.
Miabot ngadto sa 14 ka teams ang misalmot sa pasiunang dalit sa ABL.
Kini mao ang SFG, SPEAK, St. Francis, Club Amigo, SKBC Larmen ug Cruz Basketball sa Under 29 category ug YBC, Thor Olshoppe, '99ers, Jiclor, Alfa Wanbatz, Flores Cousins, Rizal Micro, ug Jonas Lechon Catering sa 30-above division.
Si ABL co-founder Lee Mar Dahil nagkanayon nga ang mga entranteng koponan sa 29 Under moduwa og single round robin diin ang top 4 moabante sa crossover semifinals bitbit ang twice-to-beat incentive. Ang mga mananaog maoy magbugno sa titulo sa usa ka knockout match.
Samtang ang walo ka mga partisipante sa 30-above magkumbati sab ubos sa single round robin format. Ang top 2 awtomatik nga motikang sa semis nga dunay twice-to-beat advantage. Samtang ang teams No. 3 batok No. 6 ug No. 4 batok No. 5 magpinaksitay sa knockout quarterfinals. Ang mga mananaog moabante sa semis. Sama sa Under 29, tagakay sab ang kampiyonato sa 30-above.
- Latest
