Sarangani niyanig ang Quezon City
MANILA, Philippines — Sa wakas, pumasok na rin sa win column ang Sarangani Province Marlins matapos sorpresahin ang paboritong Quezon City Capitals, 78-74, sa 2019 Maharlika Pilipinas Basketball League (MPBL) Lakan Cup sa Sarangani Capitol Gym sa Alabel, Sarangani.
Ang unang panalo sa 21 laro ng Sarangani ay nangyari makaraang palitan ang dating pangalan na Soccksargen Marlins.
Umarangkada ang Marlins ng 11-0 run sa huling dalawang minuto sa pangunguna nina Pari Llagas, Miko Estrellante at Jorem Morada para agawin muli ang bentahe, 72-65.
Umani si Llagas ng 17 puntos habang 12 puntos naman kay Orin Catacutan na may kasamang 11 rebounds para sa Marlins.
Tumulong din ng 11 puntos si Morada at sampu mula kay John Mark Trinidad. Tumipak din ng walong puntos si Estrellante para sa koponan ni coach Manny Torralba.
Dahil sa talo, ang QC Capitals ay nahulog sa 9-14 win-loss kartada sa Northern Division. Nasayang din ang 16 puntos ni Clark Derige at 15 puntos ni Joco Tayongtong para sa Capitals.
Sa iba pang laro, nagwagi ang Pampanga Green Lanterns kontra sa Parañaque Patriots, 82-63, upang makamit ang pang-14 panalo sa 23 laro at ihulog ang Patriots sa 8-15 slate.
- Latest
