SWU-phinma Cobras dunay tulo ka misyon sa Tagoloan
CEBU, Philippines — Ang 19th Cebu Schools Athletic Foundation, Inc. (CESAFI) basketball champion Southwestern University (SWU)-Phinma Cobras mobiyahe didto sa Mindanao sunod semana uban ang tulo ka misyon.
Una, ang Cobras ni coach Mike Reyes mopakita'g aksiyon sa 1st Mohon Fiesta Open Invitational Basketbal Tournament nga gikatakda karong Disyembre 2-3 didto sa Mohon covered court sa Tagoloan, Misamis Oriental.
Ilang sangkaon ang Tagoloan Community College (TCC) Cagers, Professional World Academy-Misamis (PWA), ug Southern Philippines College (SPC).
Labaw sa kompetisyon, gamiton sa Southwestern U ang duha ka adlaw nga torneyo nga gipasiugdahan ni Mohon Barangay Captain Francis Jerson P. Sabio isip oportunidad nga makasigpat og mga talento.
Gawas niini, ang Cobras manghatag sab og mga bola didto sa mga batan-ong basketbolista sa Tagoloan isip kabahin sa ilang community outreach project.
Human sa Tagoloan, ang Cobras molahos didto sa Kibawe, Bukidnon alang sa 1st Kibawe Mayor's Cup Open Basketball Tournament karong Disyembre 4-8.
Sa tunga-tungang bahin sa Disyembre, ang Cobras mobalik sa Tagoloan alang sa Tagoloan 32-Under Open Invitational Basketball Tournament 2019 unya sa Disyembre 16-21 diin ang makampiyon mobulsa og P150,000.
- Latest