Leonard, George nangulo sa Clippers

CEBU, Philippines — Sila si Kawhi Leonard ug Paul George nga nagkauban og duwa sa ikaupat pa lamang nga higayon ning NBA season, parehong mipabuhagay og eksplosibong opensiba aron pangulohan ang Los Angeles Clippers ngadto sa 114-99 nga  kadaogan batok sa Dallas Mavericks kagahapon didto sa American Airlines Arena sa Dallas, Texas.

Ang two-time Finals MVP nga si Leonard mibahog og 28 puntos ug walo ka rebounds, samtang si George mitali og 26 puntos ug unom ka steals alang sa Clippers nga miposte sa ikaunom nilang sagunson nga daog aron inaton ang ilang record ngadto sa 13-5 record.

Si George mikadlit og 17 puntos, apil na ang upat ka tres sa unang kuwarter hinungdan nga ang Clippers sayong milabaw sa iskor nga 34-27  Miiskor lamang og dos puntos si Leonard  sa unang kuwarter, apan mireshistro og 11 puntos sa ikaduhang kuwarter hinungdan sa pag-abante sa Clippers og 16 puntos atol sa halftime,  62-46. Wala na molingi pa sukad niadto ang naghaguros nga Clippers. 

Gumikan sa pagmangtas nilang Leonard ug George, wala kaugpo ang alas sa Mavs nga si Luka Doncic, kinsa nalimitahan ngadto sa 22 puntos, walo ka rebounds ug unom ka assists. 

Bugnaw kaayo si Doncic nga mipasud lamang og upat sa 14 niya ka itsa ug nablangko walo sa gibuhian niyang 3-pointers. Nakahimo sab siya og pito ka turnovers gumikan sa solidong depensa nga gihabol nilang Leonard ug George ngadto kaniya.

Sama sa Clippers, ang Denver Nuggets mi-angkon sab sa ikaunom nilang sunod-sunod nga daog human gipilde ang Washington Wizards, 117-104.

Si Jermani Grant maoy nangu sa Nuggets uban ang 20 puntos. 

Dako sab og natampo sila si Will Barton, Jamal Murray ug Nikola Jokic.

Sila si Barton ug Murray nagkumboya'g 33 puntos, samtang si Jokic milangkat og 20 ka rebounds alang sa Nuggets nga nagkupot na karon og 13-3 nga baraha.