Purefit Gym pabiling wa'y pilde sa FYA 24

CEBU, Philippines — Nasumpayan ang nagkutay nga daog sa Purefit Gym ug mao na lang sab ang bugtong koponan nga walay pilde sa FYA Basketball League (Season 24) Soontit Construction Cup 2019-2020.

Ang Purefit Gym mitiklo sa Bro J Bakery, 97-87 niadtong Domingo diha sa Atillo gym sa Punta Princesa, Dakbayan sa Sugbo aron padayong mag-una sa standing bitbit ang 4-0 nga baraha.

Si Wilson 'Tuko' Gabucan mikamada og 24 puntos uban ang walo ka rebounds, lima ka assists ug duha ka steals aron giyahan ang Purefit Gym ngadto sa kadaogan ug ingon man bayawon isip best player of the game.

Wala sa'y pagbahar ang duwa sa team manager nga si Mclain Alkuino ug miamot kini'g 17 puntos.

Sila si Jim Jim Rara ug Kent Pepito nag-amotay og 11 puntos, samtang si Val Ramirez mitampo'g 10 puntos sa Purefit Gym nga nakapanimaho na sa ilang sayong kadaogan human milabaw og 24 puntos pagtapos sa third quarter, 85-61.

Bugtong konsulisyon sa Bro J Bakery mao ang paglaslas sa makabungog nga labaw ngadto na lang sa 10 puntos paghuman sa duwa.

Nagkumboya'g 41 puntos sila si Justine   Urot ug Daniel Enriquez, apan wala kini kapahimusli kay ang Bro J Bakery ni Junrey Arreglo nagbitbit na man og 2-2 record.

Si Ranel Patalita mitimang og 15 puntos, samtang si Rio Dela Peña mitikdol og 12 puntos sa napildeng Bro J Bakery.

Sa laing aksiyon, ang Yoyi's Pastries & Desserts mipahamtang og laing kapildihan Pub Gee Resto Bar, 81-78 sa pagpangulo sa best player nga si Jao Rabadon nga miduslit og 23 puntos nga gipalamanan og siyam ka rebounds, upat ka assists ug duha steals.

Wala magdahom ang Yoyi's Pastries & Desserts kay sila ang pirmeng naggukod. Apan sa luyo sa ilang kakugi nakuha nila ang kutas nga daog.

Mikawat sab og salida sila si Charles Limbaga ug Juls Aglipa nga parehong mikandos og 12 puntos, ingon man si Victor Lastomen nga mitimbre'g 11 puntos sa Yoyi's Pastries & Desserts ni Ahlmark Albarracin nga nagsolo sa ikaduhang dapit sa standing sa ilang 3-1 nga baraha.

Ang Pub Gee Resto Bar   gipangulohan ni Jessie Boy Condrillon nga miantog og 19 puntos, gisundan Dave Caballes nga mihirit og 15 puntos.

Si Angelo Regudo miambit og 13 puntos sa Pub Gee Resto Bar ni Boyet Duran nga nangiwit sa standing sa ilang 0-4 record ning maong liga nga nahimo pinaagi sa paningkamot sa presidente niining si Dexter Caballero.

PUNTOS MATAG USA

Unang duwa:

YOYI'S PASTRIES (81) – J. Rabadon  23,   Limbaga 12,  J. Aglipa 12,   Lastomen 11, A. Albarracin 9, R. Caballes 4, C. Cababahay 4, W. Auditor 2, S. Enriquez 2, R. Canoy 2.

PUB GEE RESTO BAR  (78) – JB Condrillon  19, Caballes 15,  Regudo 13, B. Patricio 8, J. Ursal 7, J. Silvano 6, I. Regudo 2, J. Enriquez 2, J. Bucayan 2, A. Villarosa 2, D. Regudo  2.

Ikaduhang duwa:

PURE FIT GYM  (97) – W. Gabucan 24, Alkuino 17, Rara 11,  Pepino 11, Ramirez 10, J. Stella 8, A. Montillero 7, D. Endrina 3, G. Aguilar 3, T. Santillan 2, A. Dante 1.

BRO J BAKERY  (87) – J. Urot 21,  Enriquez 20,  Patalita 15, Dela Peña 12, N. Arias 9, E. Noquillo 8, E. Noquillo 2.