Nlex, Northport laglagan
MANILA, Philippines — Iisa lamang ang hangarin ng No. 1 NLEX at No. 8 NorthPort.
Paglalabanan ng Road Warriors at Batang Pier ang ikaapat at huling tiket sa semifinal round ngayong alas-7 ng gabi sa 2019 PBA Governor’s Cup sa Smart Araneta Coliseum.
Sa naturang laban, bahagyang dehado ang NLEX dahil suspendido sina Poy Erram at Paul Varilla bunga ng natamong Flagrant Foul penalty 2 sa Game 1 ng kanilang quarterfinal match kung saan naitulak ng Batang Pier ang do-or-die game bunga ng 115-90 panalo.
Bukod sa pagkakasuspinde, pinatawan din ng P50,000 at P40,000 multa sina Erram at Varilla, ayon sa pagkakasunod.
Sinabi ni coach Yeng Guiao na kailangang maibalik ng NLEX, may bitbit na ‘twice-to-beat’ advantage laban sa NorthPort sa quarterfinals, ang kanilang dating bangis para makopo ang huling semifinals berth.
“We need to get back our intensity. From the start kasi ano kami out-energized kami, masyadong kitang-kita ‘yung intensity nila from the very beginning; hindi namin mahabol, hindi mapantayan yung energy na ‘yun and it happened twice already,” ani Guiao.
Ang mananalo sa pagitan ng Road Warriors at Batang Pier ang sasagupa sa naghihintay na Ginebra Gin Kings sa best-of-five semifinals series.
Sa nasabing panalo ng NorthPort ay humakot si import Michael Qualis ng 39 points, 15 rebounds at 5 assists kumpara sa 12 markers ni NLEX reinforcement Manny Harris.
“Sabi ko sa mga players ko expect a physical playoff mode. Kailangan ready kami sa anumang mangyayari,” ani Batang Pier mentor Pido Jarencio.
- Latest
