Rongcales, Rollway magtagakay

CEBU, Philippines —  Wala na'y ugma pa alang sa Rongcales Customs Brokerage ug Rollway/Abay-Abay Customs Brokerage kay mag-abot sila sa katapusang higayon sa tagakay nga crossover quarterfinals sa Aduana Basketball Club Cebu (ABCC) Season 2 Inter-Brokerage Cup 2019 karong adlawa diha sa Cebu Port Authority (CPA) gym sa north reclamation area.

Ang duwa sugdan sa alas-6 sa gabii.

Ang modaog maoy makaangkon og katungod sa pakigsangka batok sa Alin Team-A sa knockout semifinals.

Buhi pa ang paglaum sa Rongcales sa semis human midaog batok sa twice-to-beat' nga Rollway/Abay-Abay, 73-55 sa una nilang panag-abot niadtong Nobiyembre 21.

Aron makasulod sa semis, ang Rongcales kinahanglan nga mopakita sa maayo nilang labok sama sa ilang gibuhat pagpilde sa Rollway/Abay-Abay.

Ang Rongcales ni playing team owner Richard Rongcales maghangad gihapon sa katakus nilang Takloy Moral, Radnie Rivera, Geomar Caynila, Karl Daculan ug Reyden Villaronza.

Magkinahanglan hinuon  sila sa suporta nilang Ray Anthony Cabrera, Arian Batiller, Adrian Laborte ug Ladie Bacor aron matuman ang gipangandoy nga semis.

Dili hinuon basta-basta nga kontra ang Rollway/Abay-Abay kay aduna sab sila'y mga tang-an sama nila ni Glenn Urbina, Eswood Sanchez, Karl Ceniza, Nick Yncierto, Jeffrey Palad ug Alain Tarona.

Anaa usab kanila silang Nimrod Amorin, Amay Palad, Jasper Malingin ug Jeson Matias nga mosuway og baraw sa laraw sa Rongcales.