Clarkson tinapos ang kamalasan ng cavaliers
CLEVELAND -- Isinalpak ni Fil-Am guard Jordan Clarkson ang lahat ng anim niyang three-point attempts para umiskor ng 28 points at tulungan ang Cavaliers na talunin ang Portland Trail Blazers, 110-104.
Tinapos ng Cleveland ang kanilang six-game losing slump.
Nagdagdag si Tristan Thompson ng 25 points, habang humakot si Larry Nance Jr., pumalit kay injured Kevin Love sa starting lineup, ng 11 points at 12 rebounds.
Ito ang ikalawang sunod na pagkakataon na hindi naglaro si Love, ang leading scorer ng Cavaliers, bunga ng kanyang sore back.
Nagbalik naman sa line-up ng Blazers si guard Damian Lillard matapos ang back spasms at tumipa ng 23 points.
Nalasap ng Trail Blazers ang kanilang ikaapat na sunod na kabiguan at pang-lima sa huli nilang pitong laban.
Umiskor naman si CJ McCollum ng 20 points.
Sa Memphis, sinandigan ng Los Angeles Lakers ang malawak nilang eksperyensa para lusutan ang Grizzlies, 109-108, tampok ang driving layup ni James sa huling 1:30 minuto ng fourth period na siyang naging garantiya ng kanilang panalo.
Ito ang pang-pitong sunod na ratsada ng Lakers.
Tumapos si James na may 30 points para sa Los Angeles, habang nag-ambag sina Anthony Davis, Rajon Rondo, Kentavious Caldwell-Pope at Dwight Howard ng 22, 14, 12 at 10 markers, ayon sa pagkakasunod.
Sa Atlanta, humataw si forward Pascal Siakam ng 34 points at nagdagdag ng 25 markers si VanVleet para tulungan ang Raptors na biguin ang Hawks, 119-116.
Naglista si Norman Powell ng 20 points para sa ikatlong sunod na ratsada ng nagdedepensang Toronto.
Binanderahan naman ni Trae Young ang Hawks, nalasap ang ikaanim na dikit na kamalasan, mula sa kanyang 30 points, 10 rebounds at 10 assists na para sa ikalawa niyang career triple-double.
Sa Salt Lake City, bagama’t hindi naglaro si center Rudy Gobert ay kumonekta naman si guard Donovan Mitchell ng anim na 3-pointers para sa kanyang season-high 37 points sa 128-120 panalo ng Utah Jazz laban sa New Orleans Pelicans.
Nag-ambag si Bojan Bogdanovic ng 28 points para sa Utah na hindi nakuha ang serbisyo ni Gobert, may sprained ankle.
- Latest