UST nagkampeon sa UAAP men’s at women’s table tennis
MANILA, Philippines — Pinatumba ng University of Santo Tomas ang National University, 2-1, sa best-of-three Finals ng UAAP Season 82 men’s table tennis tournament sa Blue Eagle Gym.
Ito ang ikalawang sunod na korona ng Tiger Paddlers at pang-28 sa kabuuan.
Binanderahan ni graduating senior Raymark Mabuang ang pagkopo ng UST sa titulo laban sa NU.
“Two months before the UAAP, talagang nagbago tayo ng lineup agad. So, nasira yung plan natin,” sabi ni Tiger Paddlers coach Jackson Que. “Pero thank God, nabuo pa rin ‘yung team at nag-perform pa rin ‘yung mga players.”
Dinuplika naman ng Tigress Paddlers ang nakamit ng kanilang men’s team nang talunin ang Ateneo Lady Eagles, 2-0, para angkinin ang kampeonato.
“Masaya kasi ang pinaka-aim ng UST is mag-champion both men’s and women’s,” ani mentor Lorinda Wadjad.
Sa high school division, binigo ng De La Salle Zobel ang UST para sa korona.
Ibinasura ng Junior Lady Green Paddlers ang hawak na ‘twice-to-beat’ advantage ng Junior Tigresses sa championship round.
- Latest
