'Do-or-die' sa Alaska, northport

CEBU, Philippines – Masayran karon kun kinsa sa Alaska Aces ug NorthPort Batang Pier ang makaangkon sa katapusang luna sa playoffs sa PBA Philippine Cup.

Ang Alaska ug NorthPort magsangka sa alas-4:30 sa hapon didto sa Smart Araneta Coliseum.

Ang Aces maoy kasamtangang naghupot sa ikawalong dapit sa standing sa rekord nga 4-6, apan kuyaw sila nga mapalagpot sa Batang Pier (3-6) kun mapilde sila sa duwa.

Pakyas ang Alaska  pagkandado sa ilang luna sa playoffs human miyukbo ngadto sa San Miguel Beermen, 96-114 niadtong Domingo didto sa Smart Araneta Coliseum.  

Hinuon, desidido ang Aces nga mosud sa playoffs bisan pa og dili gihapon moduwa  ang sinaligan nilang bigman nga si Vic Manuel tungod sa injury.

Sa ilang bahin,   ang Batang Pier ni coach Pido Jarencio madasigon kaayo sa duwa ug  magsandig kini sa ilang scorers nga sila si Stanley Pringle ug rookie Robert Bolick.

Sa main game sa alas-7 sa gabii, ang Barangay Ginebra  tuyo nga mopalig-on sa ilang kupot sa No. 3  sa ilang sangka  batok  sa natagak na nga Meralco Bolts.