Doncic bumida sa Mavs vs Spurs

DALLAS -- Nagpasabog si guard Luka Doncic ng career-high 42 points sa kanyang ikaanim na triple-double para tulungan ang Mavericks na talunin ang San Antonio Spurs.

Ipinalasap ng Dallas ang ikaanim na sunod na kamalasan ng San Antonio.

Nagdagdag ang 20-anyos na second-year player na si Doncic, nangunguna sa NBA sa triple-doubles, ng 11 rebounds at 12 assists.

Ang kanyang 3-pointer sa huling 26.5 segundo ng fourth quarter ang nagbigay sa Mavericks ng 115-110 bentahe.

Sumama si Doncic kay LeBron James ng Los A­ngeles Lakers bilang tanging mga players sa NBA history na may edad na 20-anyos na nagposte ng 40-point triple-double.

Nag-ambag si Dorian Finney-Smith ng career-best 22 points at naglista si Kristaps Porzingis ng 18 points at 10 rebounds para sa Dallas.

Sa Los Angeles, isinalpak ni Paul George ang isang go-ahead 3-pointer sa huling 25 segundo para iligtas ang Clippers kontra sa Oklahoma City Thunder, 90-88.

Nakatabla ang Oklahoma City sa 86-86 mula sa 3-pointer ni Danilo Gallinari bago nagsalpak si Chris Paul ng dalawang free throws para sa kanilang 88-86 abante.

Ang triple at free throw naman ni George ang sumelyo sa panalo ng Los Angeles.

Sa Chicago, kumamada si Giannis Anteto­kounmpo ng 33 points at 10 rebounds at inakay ang Milwaukee Bucks sa 115-101 pagdaig sa Bulls.