Harden bayani sa Rockets

CEBU, Philippines – Nagmangtas  si James Harden sa katapusang kuwarter aron  aswaton ang Houston Rockets ngadto sa 102-93 nga kadaogan batok sa Los Angeles Clippers sa NBA kagahapon didto sa Toyota Center sa Houston, Texas.

Ang two-time NBA scoring champion mipabuhagay og 47 puntos, apil na ang pito ka 3-pointers, unom ka rebounds ug pito ka assists alang sa Rockets nga nagkupot na karon og 8-3 nga baraha.

Mirapido si Harden og 17 puntos sa naghinapos nga bahin sa duwa nga nahimong taytayan sa Rockets gikan sa 84-80 nga pagkaalkansi sa nahibilin nga 5:52 sa duwa dayon na ngadto sa kadaogan.

Tayming kaayo ang pagpanginit ni Harden gumikan kay sila lamang si Russell Westbrook  ug Clint Capela ang laing mga Rockets nga  naka-double figures. Si Westbrook adunay 17 puntos, samtang si Capela adunay 12 puntos.

Ang Clippers gipangulohan ni Kawhi Leonard nga dunay 26 puntos, 12 ka rebounds ug pito ka assists. Si Lou Williams midugang og 20 puntos, apan wa'y nahimo gumikan kay ang Clippers nadakin-as ngadto sa 7-4.

Sa Eastern Conference, ang Boston Celtics miinat sa ilang baraha ngadto sa 9-1 human gipatikalbong ang Washington Wizards, 140-133. 

Pito ka Celtics ang mirehistro og double figures ubos sa pagpangu ni Kemba Walker nga mikamada og 25 puntos. Sila si Jayson Tatum ug Jaylen Brown nagkumbinar og 45 puntos.

Didto sa Orlando, si Nikola Vucevic mipupo og 25 puntos sa dihang gipakuratan sa Magic ang Philadelphia, 112-97. Wala hinuon makaduwa ang bitoon   sa Sixers nga si Joel Embiid kay dunay gihambin nga injury.