Rongcales Customs Brokerage kampiyon sa midget division sa Lapu-Lapu fiesta Basketball League 2019
CEBU, Philippines – Walay luna nga kasudlan sa kalipay sa Rongcales Customs Brokerage human nila mabuntog ang Mighty Niños sa finals aron maangkon ang korona sa midget division sa Lapu-Lapu Basketball League 2019 niadtong Sabado, Nobiyembre 6 didto sa Lapu-Lapu City gym.
Dili basta-basta ang kadaogan sa Rongcales Customs Brokerage gumikan kay ilang gilubong og tagaliog ang karibal nilang Mighty Niños sa iskor nga 60-36.
Nagkumbinar og 22 puntos sila si Tom Gerby Maluya ug James Amores aron pangulohan ang balanseng opensa sa Rongcales. Si Maluya mipupo og 12 puntos, samtang si Amores miani og 10 puntos sa Rongcales nga milabaw og 12 puntos atol sa third period.
Wala pa matagbaw, ang Rongcales ubos sa pagtimon ni head coach Constantine 'Tiny' Dela Cerna ug asst. coach Mauro Ando, mibingat sa ilang labaw nga maoy mihawan sa ilang dalan paingon sa mahimayaong kadaogan.
Nakadugang og kadasig sa Rongcales Customs Brokerage mao ang presensiya sa ilang team owner nga si Richard Rongcales, kinsa mihatag sa iyang moral support ug ingon man sa team manager nilang si Kenneth Quial.
Walay bisan usa ka magduduwa sa Mighty Niños ni coach Supremo Degollacion ang miiskor og double digits.
- Latest
