Lakers hubas sa Raptors

CEBU, Philippines —  Si Pascal Siakam mikadlit og 24 puntos ug 11 ka rebounds samtang si Fred VanVleet mitapos uban ang 23 puntos ug 10 ka assists sa dihang giputol sa Toronto Raptors ang pito ka sagunson nga daog sa Los Angeles Lakers, 113-104, sa NBA kagahapon didto sa Staples Center sa Los Angeles, California.

Nagparamdam sab si Chris Boucher nga mitabla sa iyang career-high nga 15 puntos alang sa Raptors, nga midaog kaunom sa miagi nilang pito ka duwa.

Gibihag sa Raptors ang Lakers bisan og wala ang duha ka mga bitoon nilang si Kyle Lowry ug Serge Ibaka nga pulos dunay angol.

Si Anthony Davis mipabuto og 27 puntos samtang si LeBron James mikolekta og 13 puntos, 15 ka assists ug 13 ka rebounds alang sa ika-85 nga triple-double sa iyang karera nga nakawang gumikan kay ang Lakers nahagba sa labing unang higayon sukad sila giparotan sa ilang silingan nga LA Clippers atol sa ilang season-opener.

Sa laing aksiyon, si Nikola Jokic milansang sa iyang fadeaway jumper sa nahibilin nga 2.4 puntos sa overtime aron aswaton ang Denver Nuggets ngadto sa 100-98 nga kadaogan batok sa Minnesota Timberwolves.

Si Jokic dunay 20 puntos, unom ka rebounds ug pito ka assists alang sa Nuggets nga miposte sa ikaupat nilang sunod-sunod nga daog.

Sa uban pang mga resulta, si Joel Embiid mitali og 18 puntos ug siyam ka rebounds ug si Al Horford miamot og 15 sa dihang gipayaka sa Philadelphia 76ers ang Charlotte Hornets, 114-106, samtang si Giannis Antetokounmpo mipupo og 35 puntos ug 16 ka rebounds sa dihang gibuntog sa Milwaukee Bucks ang Oklahoma City Thunder, 121-119.

Si Antetokounmpo giabagan ni  Eric Bledsoe nga dunay 25 puntos ug siyam ka assists alang sa Bucks nga midaog kalima sa katapusan nilang unom ka duwa.