Lakers padayong miratsada

CEBU, Philippines — Si Anthony Davis mikadlit og 26 puntos ug siyam ka rebounds, samtang si LeBron James miiskor og 12 sa iyang 25 puntos sa katapusang kuwarter sa dihang gipabugnaw sa Los Angeles Lakers ang Miami Heat, 95-80 alang sa ikapito nilang sagunson nga daog sa NBA kagahapon didto sa Staples Center sa Los Angeles, California.

Ang four-time MVP nga si James milansang og duha ka hagpok nga tres sa himalatyong segundos sa duwa aron silyohan ang laing daog sa Lakers nga wala na mapilde pa sukad gipahagba sa silingan nilang LA Clippers atol sa ilang season-opener. Gumikan sa solido nilang depensa, gilimitahan sa Lakers ang Heat ngadto lamang sa usa ka field goal ug sayes puntos sa nahibiling  8:54 sa aksiyon. Gawas niini, ila sab nga gilupig ang Heat sa rebounding, 48-37.

Si Jimmy Butler adunay 22 puntos, samtang si Goran Dragic mitali og 19 puntos sa Heat nga napilde sa ikaduhang higayon sa tulo nila ka road games.

Sa laing duwa, si Pascal Siakam mitabla sa iyang career-high 44 puntos aron pangulohan ang defending champion Toronto Raptors pag-ihaw sa New Orleans Pelicans, 122-104.

Ang Raptors maoy miposte sa nag-unang 15 puntos sa ikaduhang kuwarter dayon na ngadto sa pagposte og komportabling 75-53 nga labaw sa halftime.

Ang Raptors mirehistro sa ikaunom nilang daog sud sa walo ka duwa bisan og wala sila si Kyle Lowry ug Serge Ibaka nga parehong dunay gihambin nga injury.

Misalida sab si Fred VanVleet uban ang 12 puntos ug 11 ka assists ug ingon man si OG Anunoby nga mipatik og 21 puntos uban ang pito ka rebounds.

Si Brandon Ingram maoy nangu sa pilderong Pelicans pinaagi sa iyang 27 puntos, samtang si Jrue Holiday mihipos og 16 puntos alang sa pilderong Pelicans.