Leonard humataw sa Clippers vs Jazz

LOS ANGELES – Humugot si Kawhi Leonard ng 18 sa kanyang 30 points sa fourth quarter para pamunuan ang 105-94 panalo ng Clippers laban sa Utah Jazz.

Sa likod ni Leonard ay binura ng Clippers ang double-digit second-half deficit para ilista ang ikaapat na sunod na panalo.

Matapos magtabla sa 86-86 ay iniskor ni Leonard ang anim sa inihulog na 19-8 bomba ng Los Angeles para resbakan ang Utah.

Nagdagdag si Montrezl Harrell ng 19 points kasunod ang 17 markers ni Lou Williams para sa Clippers.

Binanderahan naman ni guard Donovan Mitchell ang Jazz mula sa kanyang 36 points habang may 19 markers si Bojan Bogdanovic.

Sa San Antonio, humakot si Anthony Davis ng 25 points at 11 rebounds at nagsumite si LeBron James ng triple-double para ihatid ang Los Angeles Lakers sa 103-96 panalo laban sa Spurs.

Kumamada si James ng 21 points, 13 assists at 11 rebounds para sa kanyang ikalawang sunod na triple-double para sa Lakers.

Sa Cleveland, inilista ni Luka Doncic ang kanyang ikalawang sunod na triple-double at ikatlo sa season para tulungan ang Dallas Mavericks sa 131-111 paggupo sa Cavaliers.

Tumapos si Doncic na may 29 points, 14 rebounds at career high-tying 15 assists para banderahan ang Mavericks.