Pinay Spikers masusukat ang lakas
MANILA, Philippines — Masusubukan ang tikas ng national women’s volleyball team sa pagsambulat ng Philippine Superliga (PSL) Super Cup ngayong hapon sa The Arena sa San Juan City.
Unang makakasagupa ng Pinay Spikers ang PSL Shine na lalarga sa alas-5 ng hapon habang maghaharap naman ang PSL Sparkle at guest team University of Tsukuba sa alas-7 ng gabi.
Nakatakda ang simpleng opening ceremony sa alas-3 ng hapon.
Galing ang national team sa 12 araw na training camp sa Tokyo, Japan bilang bahagi ng paghahanda nito sa 2019 Southeast Asian Games na papalo mula Nobyembre 30 hanggang Disyembre 11 sa Pilipinas.
Isasalang ni national team head coach Shaq Delos Santos sina Aby Maraño, Mika Reyes, Kalei Mau, Mylene Paat, Dawn Macandili, Majoy Baron, Frances Molina, Rhea Dimaculangan, Jovelyn Gonzaga, Kat Arado at Eya Laure.
“We would be giving our all because we’re playing in front of our countrymen. This is a golden chance for us to show what we’ve got and learn from the Japanese team along the way,” ani Delos Santos.
- Latest
