LeBron, Davis mibida na sab sa Lakers
CEBU, Philippines — Mikulit si Anthony Davis og 25 puntos uban ang 11 ka rebounds, samtang si LeBron James mikadlit og 21 puntos, 13 ka assists ug 11 ka rebounds sa dihang gibihag sa Los Angeles Lakers ang San Antonio Spurs, 103-96 sa nagpadayong aksiyon sa National Basketball Association kagahapon didto sa AT&T Center sa San Antonio, Texas.
Mao kadto ang ikaduhang sagunson nga "triple-double" ni James.
Ang una iyang gihimo niadtong Sabado atol sa ilang 119-110 nga kadaogan sud sa overtime batok sa Dallas Mavericks didto sa American Airlines Arena sa Dallas, Texas.
Nakatampo sab og dako si Dwight Howard nga mitali og 14 puntos ug 13 ka rebounds alang sa Lakers nga mirehistro sa ikalima nilang sunod-sunod nga daog human maparot sa silingan nilang L.A. Clippers atol sa ilang season-opener.
Si Dejounte Murray adunay 18 puntos ug 11 ka rebounds alang sa Spurs. Si Rudy Gay mihipos og 16 puntos, samtang si DeMar DeRozan nalimitahan ngadto lamang sa 14 puntos alang sa San Antonio nga nasugamak sa ikaduhang higayon sukad ablihi ang ilang kampanya uban ang impresibong 4-0 record.
Ang Lakers milusad og nagkayong 30-18 rally sa ikatulong kuwarter nga maoy nahimo nilang hagdanan ngadto sa kalampusan.
Ang Spurs igo lamang nakatabla sa iskor nga 90-90 sa katapusang 4:10 sa aksiyon gumikan kay ang Lakers miresbak pinaagi sa 7-0 run nga gitak-op sa makalisang nga dunk ni Howard nga maoy nagtuldok sa kadaogan sa bisitang L.A. Lakers.
- Latest