Bucks misungag sa Raptors

CEBU, Philippines — Hapit mokulit og triple-double si Giannis Antetokounmpo sa dihang gipakaging sa Milwaukee Bucks ang defending champion Toronto Raptors, 115-105, sa labing una nilang panag-abot sukad sa miaging NBA Eastern Conference finals.

Ang reigning MVP nga si Antetokounmpo miposte og 36 puntos uban sng 15 ka rebounds ug walo ka assists alang sa Bucks nga dominante kaayo ug sa usa ka higayon mirehistro og 26 puntos nga labaw.

Midugang si Eric Bledsoe og 14 puntos ug siyam ka rebounds alang sa Bucks, nga nakakubit sab og tag-11 puntos gilkan nilang Khris Middleton ug Brook Lopez.  

Si Kyle Lowry maoy nangu sa Toronto uban ang 36 puntos samtang si Pascal Siakam mipupo og 16 puntos sa pilderong kawsa.

Nakawang sab ang paningkamot nilang Fred VanVleet nga dunay 12 puntos, Serge Ibaka nga mi-iskor og 11 ug Marc Gasol nga mikolekta og 10 puntos ug 12 ka rebounds.

Ang Raptors igo lamang nakasikit ngadto sa kuwatro puntos gumikan kay ang Bucks nakabawi dayon aron pagdagit og 10 puntos nga kadaogan.

Sa laing aksiyon, si Andrew Drummond mihipos og 20 puntos ug 20 ka rebounds sa dihang gipukan sa Detroit Pistons ang Brooklyn Nets, 113-109.

Dako sab og natampo si Bruce Brown nga mitali og 22 punots ug pito ka assists ug ingon man si Luke Kennard nga miharos og 24 puntos.

Wa magsilbe ang triple-double ni Kyrie Irving sa habig sa Nets. Si Irving mitimbre og 20 puntos, 11 ka rebounds ug 10 ka assists.

Didto sa San Francisco, si Terry Rozier mipasud sa iyang short jumper nga iyang gisundan og duha ka free throws sa nahaibiling kuwatro segundos aron agakon ang Charlotte Hornets ngadto sa 93-87 nga kadaogan batok sa nagkayuring nga Golden State Warriors.

Daw gibiay-biayan gyud sa dili maayong palad ang Warriors gumikan kay wala makaduwa ang nahibilin nilang bitoon nga si Draymond Green kay dunay gihambin nga injury sa iyang tudlo.