Donaire kailangang mag-ingat kay Inoue
MANILA, Philippines — Dobleng ingat ang gagawin ni World Boxing Association (WBA) super bantamweight champion Nonito Donaire sa pagsagupa nito kay Japanese fighter Naoya Inoue sa finals ng World Boxing Super Series bantamweight division sa Nobyembre 7 sa Saitama Super Arena sa Saitama, Japan.
Tumulak si Donaire sa Japan hawak ang determinasyong makuha ang panalo sa kabila ng home crowd advantage ng Japanese boxer.
Mas bata rin ng 10 taon si Inoue na itinuturing ng ibang boxing fans bilang bentahe nito kay Donaire.
Subalit ang malalim na karanasan ni Donaire ang magsisilbing pangunahing sandata nito. Mayroon itong 45-5 rekord tampok ang 40 impresibong KO wins.
“I’m very motivated and incredibly excited to jump into a fight with Naoya. It gives me joy and satisfaction because I can fight in Japan,” ani Donaire.
Aminado si Donaire na mapapalaban siya ng husto sa Japanese pug na armado ng 18-0 rekord tampok ang 16 knockouts.
Kaya naman walang puwang ang anumang pagkakamali para kay Donaire lalo pa’t preparadong-preparado rin si Inoue na hawak ang International Boxing Federation (IBF) at World Boxing Association (WBA) regular bantamweight belts.
“The one who commits the first mistake in the ring, he will lose. I can tell you that this fight could be long like a game of chess,” ani Donaire sa panayam ng boxingscene.com.
Alam ni Donaire na isa si Inoue sa pinakamatinding makakalaban nito.
At walang magagawa si Donaire kundi ilabas ang lahat ng alas nito para masikwat ang panalo.
- Latest
