Bro J Bakery nakasagunson og daog sa FYA Season 24

CEBU, Philippines — Nahimo na sab nga best player si Justine Urot human niya pangulohi ang Bro J Bakery paghaon sa ilang ikaduhang sunod-sunod nga daog pinaagi sa pagpaluhod sa Masterline, 77-62 sa FYA Basketball League Season 24-Soontit Construction Cup 2019-2020 niadtong Martes diha sa Atillo gym sa Punta Princesa.

Ang season 23 MVP nga si Urot miposa og 17 puntos alang sa Bro J Bakery ni Junrey Arreglo nga temporaryo karong nag-una sa sanding bitbit ang 2-0 nga baraha.

Wala sab magpaperi si Van Anthony Ensong nga miamot og 15 puntos ug ingon man si Daniel Enriquez nga  mitampo'g 10 puntos sa Bro J Bakery, kansang duwa wala gyud mobahar gikan sa pagsugod hangtod sa katapusang gutlo.

Misikit unta ang Masterline sa halftime, 31-36, apan ang Bro J Bakery padayon mihaling sa nagdilaab nilang opensa aron inaton og balik ang ilang labaw, 55-43 human sa third period.

Ang Masterline ni Noel Medalle nga adunay 1-1 record, gipangulohan ni Jimboy Engaling nga migaling og 13 puntos, gisundan ni Francis Paracuelles nga mikandos og 11 puntos.

Sa laing duwa, ang Yoyi's Pastries & Desserts mibuntog sa Harold's Hotel aron makaeskapo bitbit ang 80-78 nga kadaogan.

Responsabli sa kadaogan si Jao Rabadon nga mao sab ang best player of the game human mibagnos og 28 puntos.

Sila si Julz Aglipa ug Ronald Canoy nag-amotay og 10 puntos sa 1-1 nga Yoyi's Pastries & Desserts ni Ahlmark Albarracin.

Kontrolado sa Yoyi's Pastries & Desserts ang duwa, medyo nahulga sila hinapos nga bahin sa fourth quarter dihang misikt ngadto na lang sa dos puntos ang Harold's Hotel luyo sa paningkamot ni Ava Flores.

Si Flores mikadlit og 21 puntos aron pangulohan ang scoring sa Harold's Hotel ni Arnel Trinidad nga nakatilw sa ikaduhang sunod-sunod nga pilde.

Miambit og 12 puntos si Nene Billones, ingon man si Ryan Dacayana nga mihirit og 10 puntos 0-2 nga Harold's Hotel.

PUNTOS MATAG USA

Unang duwa:

YOYI'S PASTRIES  (80) – Rabadon 28, J. Aglipa 10

Canoy - 10, R. Caballes 8,

W. Mata  7, C. Cababahay 6, V. Lastomen 4, J. Salvador 4, S. Enriquez 3.

HAROLD'S HOTEL  (78) – A. Flores 21, N. Billones 12, R. Dacayana 10, R. Arias 11, J. Cabañez  6, C. Arnado  5,

E. Jumantoc 4, J. Celestial 4, N. Laborte 3, S. Cal 2.

Ikaduhang duwa:

BRO J BAKERY  (77) – J. Urot 17, VA. Ensong 15, Daniel Enriquez 10, R. Dela Peña 7, R. Patalita 7, J. Arreglo 6, N. Arias 5, J. Flores 4, E. Noquillo 2, EL. Noquillo  2, C. Laud  2.

MASTERLINE  (62) – J. Engaling 13, F. Paracuelles 11, J. Jabonero 8, D. Bocado 6, R. Perami 6, S. Aglipa 6, C. Malicay 6, J. Eriso 6, S. Lumagbas 4.