Alvarez, Kovalev magbinukbukay na
CEBU, Philippines — Si Canelo Alvarez mosuway pagdugang og laing panid sa iyang legasiya sa iyang pagkatkat og duha ka dibisyon aron lamang sangkaon si WBO light heavyweight champion Sergey 'Krusher' Kovalev karong adlawa didto sa Las Vegas.
Ang 29-anyos nga Mexican middleweight champion (52-1-2, 35KOs) maoy inilog sa tapad ning sangka tali sa kabatan-on ug kaabtik batok sa kasinatian ug hilaw nga kusog sa sinuntokan ni Kovalev.
Si Alvarez moaway sa labing unang higayon sukad gipilde si Daniel Jacobs pinaagi sa unanimous decision niadtong Mayo, samtang ang 36-anyos nga si Kovalev nakadepensa sa iyang korona human gipatikangkang sa ika-11 nga hugna ang Briton nga si Anthony Yarde niadtong Agosto didto sa Russia.
Bisan tuod og si Alvarez nakampiyon na sa pipila ka mga weight divisions, walay pa siya makaaway lapas sa super middleweight class diin iyang gipalukapa si Rocky Fielding sud lamang sa tulo ka hugna sa miaging tuig.
Mao kini ang lisud nga tahas nga iyang sagubangon sa iyang pakigbinukbukay batok sa mas dako, mas taas ug mas lapad nga si Kovalev (34-3-1, 29KOs).
- Latest