Grancho nakatilaw na gyud og daog

CEBU, Philippines — Natambalan na gyud ang kauhaw sa Grancho Customs Brokerage human midaog batok sa Alin Team-B (I&R Alin Logistics Int'l. Corp.), 89-82 sa nagpadayong aksiyon sa Aduana Basketball Club Cebu (ABCC) Season 2 Inter-Brokerage Cup 2019 niadtong Lunes diha sa Cebu Port Authority (CPA) gym.

Kini ang labing unang daog sa Grancho sud sa lima ka duwa, apan bisan pa sa ilang kadaogan, wala na sila'y pag-asa pa nga makabahin og luna sa crossover quarterfinals kay naungot man gihapon sila sa ikaunom nga dapit sa bracket A standing.

Si Israel Manlosa maoy nangulo sa Grancho  pinaagi sa iyang double-double performance nga adunay 22 puntos ug 11 ka rebounds. Mipasa sab siya og upat ka assists nga igo na alang kaniya aron tahuron nga best player of the game.

Mihirit sab og 20 puntos si Lope, samtang sila si Chamvers Remonde ug Yvien Trangia mitampo'g 14 ug 13 puntos sa Grancho nga naglumpayat sa tumang kalipay human sa maong kadaogan.

Ang Alin Team-B nga napilit sa kinailawmang bahin sa standing bitbit ang 0-5 nga baraha, gipangulohan ni Justine Toring nga mikabkab og 18 puntos, samtang si Niel Egpit mikamada'g 12 puntos sa napildeng koponan.

Sa laing aksiyon sa bracket A, ang Hov/Martinez Customs Brokerage mipahayag pa sa ilang tsansa nga makuha ang 'twice-to-beat' incentives sa quarterfinals dihang ilang gilat-an og maayo ang Avenido Customs Brokerage, 110-68.

Sa kasamtangan, ang Hov/Martinez Customs Brokerage nakigsawo sa liderato uban sa Rollway/Abay-Abay Customs Brokerage sa managsama nilang 4-0 nga baraha.

Sila si Daniel Enriquez ug Rex Bensi parehong mibagdok og 21 puntos, apan si Enriquez maoy napiling best player of the game dihan milangkat siya og pito ka rebounds uban ang lima ka assists.

Mikawat sab og salida si Wendell Rollon nga mibagnos og 20 puntos.

Sila si Baeng Medalle ug Jaymar Elloren nagkumbinar og 22 puntos sa daogan nga Hov/Martinez.

Pareho sab nga mipaarak og 12 puntos sila si Irlito Avenido ug Ericson Avenido aron pangulohan ang koponan nilang Avenido Customs Brokerage.

May paglaum pa hinuon ang Avenido nga moabante sa quarterfinals ug ang bugtong nilang buhaton mao ang pagdaog sa nahibiling duha nila ka duwa.

Si Kharl Apa miamot og 10 puntos alang sa Avenido Customs Brokerage nga miariya'g 2-3 nga baraha ning  maong liga nga gipadagan ni commissioner Sidney Ganapin.

PUNTOS MATAG USA

Unang duwa:

HOV/MARTINEZ (110) – D. Enriquez 21, Bensi 21, Rollon 20, B. Medalle 12, Elloren 10, Monares 7, Jadraque 6, Cal

2, Dungog 2, Del Rosario 2, Caraballe 2.

AVENIDO (68) – I. Avenido 12, E. Avenido 12, Apa 10, Juntilla 9, Dungog 8, Tampus 7, Mondin 6, Oporto 6, Lucernas

6, J. Avenido 6, Guillon 4.

Ikaduhang duwa:

GRANCHO (89) – Manlosa 22, Lope 20, Remonde 14, Trangia 13, Largosa 7, Monterde 6, Baluran 5, Aragon 2.

ALIN TEAM-B (82) – Toring 18, Egpit 12, Manolong 9, Colegado 8, Gamao 8, Raya 4, Laurel 4, Baltonado 4, Alin 3,

Nudalo 2, Semblante 2, Diez 2.