Orcollo, Aranas tumutumbok pa

MANILA, Philippines — Hindi maawat si two-time world champion Dennis Orcollo nang magrehistro ito ng apat na sunod na panalo para makahirit ng tiket sa fifth round ng 2019 International 9-Ball Open na ginaganap sa Sheraton Norfolk Waterside Hotel sa Norfolk, Virginia sa Amerika.

Umarangkada agad si Orcollo nang igupo nito si Liu Cheng Chieh ng Chinese-Taipei sa bendisyon ng 11-8 desisyon kasunod ang pagbomba sa isa pang Taiwanese player na si Ko Ping Han sa second round (11-6).

Dumaan sa pagsubok si Orcollo bago itakas ang 11-10 dikit na panalo laban kay Corey Deuel ng Amerika sa third round habang pinatumba rin nito si American cue master Justin Bergman sa fourth round (11-9).

Sasagupain ni Orcollo sa fifth round si Maximillian Lechner ng Austria na umiskor ng 11-10 panalo laban kay Shane Van Boening ng Amerika sa hiwalay na fourth-round game.

Umabante naman sa fourth round si James Aranas nang gulantangin nito si defending champion Chang Jung Lin ng Chinese-Taipei sa pamamagitan ng 11-3 demolisyon sa third round ng torneong nagpapatupad ng double elimination format.

Makakaharap ni Aranas si Alex Kazakis ng Greece na namayani kay Fedor Gorst ng Russia sa hiwalay na third-round game (7-11).