NLEX road warriors gusto makigsawo sa liderato uban sa tnt katropa

CEBU, Philippines — Suwayan sa NLEX Road Warriors pagsakmit sa ikapito nilang daog sa dihang ilang harungon ang Rain or Shine Elasto Painters karong adlawa sa pagpadayon sa PBA Governors' Cup didto sa Cuneta Astrodome.

Sugdan ang duwa sa alas-4:30 sa  hapon.

Kon modaog ang Warriors, makigsawo kini sa liderato uban sa igsuon nilang koponan TNT KaTropa nga nagsolo karon sa unang dapit sa ilang 7-1 nga baraha.

Ang Road Warriors mao ang gitan-aw nga labing delikadong koponan karon, ilabi na nga sila ang mipatilaw sa unang pilde sa KaTropa niadtong Biyernes.

Segurado na sa playoffs, ang NLEX gusto pa nga mopalig-on sa ilang kupot sa twice-to-beat advantage atol sa quarterfinals.

Misulbong nga labing ngilngig nga import sa  Governors Cup ang kanhi Cleveland Cavaliers ug Los Angeles Lakers nga si Manny Harris nga nag-average og 41 puntos sud sa duha ka duwa uban sa NLEX.

Sa main game sa alas-6:45 sa gabii, ang Barangay Ginebra Kings makigharong sa Blackwater Elite.