Donaire maglisud ni Inoue
CEBU, Philippines — Nakita sa American boxing columnist nga si James Slater nga paborado nga mudaog ang Japanese superstar nga si Naoya Inoue batok sa four-division Pinoy world champ nga si Nonito Donaire Jr. sa panagbangga sa duha sunod buwan didto sa Japan.
Sila si Inoue ug Donaire mag-ilog sa IBF ug WBA bantamweight titles uban ang Muhammad Ali trophy nga maoy simbolo nga sila ang labing kusgan nga bantamweight sa kalibutan.
Si Slater nagkanayon nga dili makuwestiyon ang abilidad ug legasiya ni Donaire, apan makaapekto ang pangedaron sa Pinoy champion batok sa mas bata nga si Inoue. Si Donaire nga nagpangedaron og 36-anyos mas maguwang og 10 ka tuig sa Japanese knockout artist.
“As good as Donaire is, or was, no-one is ruling out another quick win for Inoue. Donaire, the WBA champ, is 36 years old and his prime has certainly passed him,” matud pa ni Slater sa boxinginsider.com.
Si Slater midugang nga bugtong tsansa ni Donaire nga mudaog mao nga mapugos niya si Inoue pagukod kaniya ug kung magamit sa Pinoy ang iyang kasinatian. Kinahanglan usab nga mulungtad si Donaire hangtud sa 12 rounds aron mudaog batok sa iyang kaatbang.
- Latest
