Aces humirit pa ng tsansa sa quarters
MANILA, Philippines — Binuhay ng Alaska ang kanilang nanganganib na pag-asa.
Sinandigan ang mga role players sa fourth quarter, pinatumba ng Aces ang Blackwater Elite, 101-91 sa 2019 PBA Governor’s Cup kahapon sa Smart Araneta Coliseum.
Ito ang ikalawang panalo ng Alaska sa walong laro para makatabla sa ilalim ng team standings ang Blackwater (2-6) at Phoenix (2-6),.
“We just know how important this game was and we know we have a chance to get into the playoffs,” sabi ni guard Jeron Teng na kumolekta ng 19 points, 8 rebounds at 3 assists para pamunuan ang tropa ni coach Jeff Cariaso.
Nagdagdag naman sina import Franko House at Abu Tratter ng tig-18 markers kasunod ang 12 points ni Vic Manuel.
Inangkin ng Aces ang 29-19 abante sa pagsasara ng first period hanggang iposte ang 14-point lead, 60-36 sa halftime.
Matapos mabaon sa 58-73 ang Elite, nahulog sa kanilang ikatlong dikit na kamalasan, ay nailapit nila ang labanan sa 73-78 tampok ang three-point play, fastbreak basket at triple ni Mac Belo sa huling 1:27 minuto ng third quarter.
Inasahan ng Alaska sina Teng, Jake Pascual at Kevin Racal para muling makalayo sa 95-79 sa huling 5:23 minuto ng final canto.
Hindi na ito napababa ng Blackwater, nakahugot ng 18 points sa bagong hugot na si Niño Canaleta tampok ang 5-of-5 shooting sa three-point line.
Pinamunuan ni import Marqus Blakely ang Elite mula sa kanyang 19 points, 7 boards at 7 assists habang may tig-14 markers sina Belo at No. 2 overall pick Bobby Ray Parks Jr.
- Latest
