Irving naka-'record'

CEBU, Philippines — Nagmangtas si Kyrie Irving sa labing una niyang duwa uban sa  Brooklyn, apan ang iyang 50 puntos dili igo gumikan kay ang Nets napilde ngadto sa Minnesota Timberwoles, 127-126 sud sa overtime atol sa ilang NBA season-opener kagahapon didto sa Barclays Center sa Brooklyn, New York.

"Outstanding. Great debut for him," matud pa ni Nets coach Kenny Atkinson agi'g pagdayeg ni Irving human gibuak niini ang karaang rekord nga 47 puntos alang sa labing daghan nga puntos nga gikulit sa usa ka player nga nag-debut sa usa ka  team.

Nindot unta kaayo ang gipakitang labok sa Nets gumikan kay mibangon sila human malubong og 18 puntos sa ikaduhang kuwarter aron pagpuwersa og overtime.

Sa dihang ang Nets nakasikit sa iskor nga 126-127 human sa duha ka free throws ni Irving, duna pa unta sila'y tsansa nga modaog, apan si Irving nasipyat sa katapusan niining itsa.

Wala hinuon magmahay si Irving bisan og naparot sila taliwala sa impresibo niyang salida.

Si Karl Anthony Towns maoy nangu sa Minnesota uban ang 36 puntos ug 14 ka rebounds.

Sa laing bahin, gisugdan sa Boston Celtics ang ilang kinabuhi nga wala na si Irving pinaagi sa pagtilaw og pait nga kapildihan sa mga kamot sa Philadelphia 76ers, 93-107.

Si Ben Simmons maoy bida sa Celtics human mikadlit og 24 puntos, walo ka rebounds ug siyam ka assists.

Wala sab magpabitin si Charlotte rookie PJ Washington human kini mitimbre og 27 puntos aron aswaton ang Hornets ngadto sa 126-125 nga kadaogan batok sa Chicago Bulls.

Didto sa  Dallas, si reigning NBA Rookie of the Year Luka Doncic ug Kristaps Porzingis nagkumboya'g 57 puntos sa dihang gipukan sa Mavericks ang Washington Wizards, 108-100.