Basilan umaasang masusundan pa ang kanilang tagumpay

MANILA, Philippines — Pinatunayan ng Basilan na may ibubuga ito sa mundo ng basketball matapos magkampeon sa PBA D-League at Chooks-to-Go 3x3.

At umaasa si Basilan team manager Jackson Chua na maipagpapatuloy ng tropa ang magandang nasimulan nito sa mga susunod na torneo.

“This is really what we hope to achieve when the team started participating in sports, especially basketball. As a team, we will continue to do our share to create a good image for Basilan,” ani Chua sa 44th Usapang Sports ng Tabloids Organization in Philippine Sports (TOPS) kahapon sa National Press Club sa Intramuros, Manila.

Nasungkit ng Basilan-St. Clare College ang kampeonato sa PBA D-League Foundation Cup matapos payukuin ang Marinerong Pilipino sa pamamagitan ng 2-1 desisyon sa best-of-three championship series.

“It’s a winning combination -- Basilan and St. Clare. We’re a young team. We have the energy, the speed, the quickness against them. Talagang gustong manalo ng mga bata. I think yun ang strength namin in the series,” ani Saints head coach Steve Tiu.

Para kay coach Jimmy Manansala, ang tagumpay ay produkto ng pagsisikap ng buong koponan.

“Yun time management namin mahirap talaga dahil nag-aaral pa yun mga ibang players at naglalaro sa NAASCU where we are also in the finals,” ani Manansala na dating PBA Rookie of the Year.