Twice-to-beat laraw sa TNT

Paningkamotan karon sa TNT KaTropa nga morehistro sa ikapito nilang daog aron makabaton og twice-to-beat advantage sa playoffs sa PBA Governors' Cup.

Ang KaTropa nga mao na lang ang bugtong koponan nga walay pilde, makigharong sa Alaska Aces karong alas-7 sa gabii human sa duwa tali sa Meralco Bolts ug Blackwater Elite nga sugdan sa alas-4:30 sa hapon didto sa Ynares Center.

Ang TNT maoy unang koponan nga misud sa playoffs human sa ilang 116-113 nga kadaogan   batok sa Meralco Bolts niadtong Biyernes.

Si coach Bong Ravena nagkanayon nga dili pa mahingpit ilang kalipay kon dili nila makuha ang twice-to-beat advantage   nga makahatag nila og tsansa nga mobalik sa finals.

Sama sa gihapon, ang TNT bidahan ni ex-Houston Rockets standout  KJ McDaniels, kinsa mirehistro sa iyang PBA record nga 51 puntos batok Meralco.

Nanginahanglan hinuon og igong suporta gikan sa lokal niyang kaubanan.

Samtang ang Alaska tuyo sab nga mokulit sa ikaduha nilang daog aron mahayagan ilang tsansa alang sa playoffs.