Pacific Town-Army sibak sa Creamline
Petrogazz kinumpleto ang semis
MANILA, Philippines — Napasuko ng nagdedepensang Creamline ang Pacific Town-Army, 25-15, 25-18, 25-22 para manatiling malinis ang rekord nito sa 2019 Premier Volleyball League (PVL) Open Conference kahapon sa The Arena sa San Juan City.
Kumuha ng lakas ang Cool Smashers kina MVP candidate Jema Galanza at Filipino-Japanese middle blocker Risa Sato upang pamunuan ang kanilang tropa sa pagkopo ng ika-14 sunod na panalo.
Umani si Sato ng 12 puntos mula sa siyam na attacks at tatlong blocks.
Naasahan din ng Creamline sina opposite hitter Michele Gumabao, Celine Domingo at reserve wing spiker Rosemarie Vargas na nagbigay ng solidong kontribusyon partikular na sa third set upang makuha ang panalo.
Nagtala si Vargas ng 10 hits at 15 receptions samantalang may tig-walong puntos sina Gumabao at Domingo sa larong tumagal lamang ng isang oras at siyam na minuto.
Sa ikalawang laro, iginupo ng PetroGazz ang Philippine Air Force, 25-20, 25-15, 25-14 para kumpletuhin ang Final Four.
Umangat sa 10-4 ang Gazz Angels.
Ang panalo rin ng PetroGazz ang awtomatikong nagbigay sa Motolite (9-5) ng tiket semis.
- Latest
