F2 Logistics o Petron?

MANILA, Philippines — Pag-aagawan ng Petron at F2 Logistics ang kampeonato sa pagsambulat ng 2019 Philippine Superliga Invitational Conference one-game finals ngayong araw sa Ynares Sports Center sa Pasig City.

Magkukrus ang landas ng Blaze Spikers at Cargo Movers sa alas-6 ng gabi habang magtatagpo naman ang Foton at Cignal sa battle-for-bronze game sa alas-4 ng hapon.

Ito ang ikapitong pagkakataon na maghaharap ang Petron at F2 Logistics sa finals.

Kaya naman asahan ang matinding pukpukan tampok ang kani-kanilang matitikas na manlalaro.

Ipaparada ng Cargo Movers si Filipino-American Kalei Mau na mala-import ang inilalaro habang makakasama nito sina Aby Maraño, Dawn Macandili, Majoy Baron, Kianna Dy, Desiree Cheng, Kim Fajardo at Ara Galang na malalim na ang championship experience.

“Thursday will be the moment of truth for both teams. We have to give our best because there won’t be any excuses. We have only one shot at wining the title and there will be no more Game 2 or 3 for us,” ani F2 Logistics head coach Ramil de Jesus na nagmamay-ari ng 11 titulo sa UAAP.

Tatapatan naman ito ng Petron sa pangunguna nina national team members Ces Molina at Rhea Dimaculangan.

Nariyan pa ang matikas na tambalan nina Sisi Rondina at Bernadeth Pons gayundin nina middle blockers Remy Palma at Chloe Cortez, libero Denden Lazaro at Buding Duremdes at opposite hitter Aiza Maizo-Pontillas.

Nais ng Petron na kalimutan na ang masaklap na karanasan nito sa All-Filipino Conference kung saan natalo ang Blaze Spikers sa HD Spikers sa semis.