Yulo, Petecio makadawat og P1 milyon
CEBU, Philippines — Gibuligan og sunod-sunod nga grasya ang mga bag-ong World Championship gold medalists nga sila si gymnast Carlos Yulo ug Pinay boxer Nesthy Petecio.
Gumikan kay makadawat sila og usa ka milyon ka pisos matag usa gikan ni sports patron Manny V. Pangilinan.
Ang Manny V. Pangilinan Sports Foundation mianunsiyo nga hatagan nila og P1 million bonus ang duha tungod sa dakong dungog nga ilang nahatag sa nasud.
Si Yulo mikulit og kasaysayan niadtong Domingo kay siya ang labing unang Pinoy gold medalist sa Gymnastics World Championships didto sa Germany. Si Yulo nga mi-qualify na sa 2020 Tokyo Olympics, mipakita nga usa siya sa mga paglaum sa nasud alang sa gold medal sa Southeast Asian Games sunod bulan.
Sa iyang bahin, ang beteranang boksidor nga si Petecio milabni usab og gold medal sa AIBA Womens Boxing World Cup human midaog pinaagi sa split decision batok ni Russian featherweight boxer Liudmila Vorontsove didto sa Russia.
"The Filipino athletes will always have an ally in the MVP Sports Foundation (MVPSF). We know we have world class athletes and we know they can be the best in the world if they get the support they needed," matud pa ni MVP Foundation official Al Panlilio sa Sports5.
Gawas sa usa ka milyon gikan sa MVP Foundation, misaad sab ang Philippine Sports Commission nga mohatag og cash incentives sa maong mga atleta tungod sa ilang kalampusan.
- Latest