Herro andam na mopadilaab sa Heat
CEBU, Philippines — Idugang si Tyler Herro sa Miami Heat sa listahan sa mga rookies nga andam na kaayo sa umaabot nga NBA regular season.
Si Herro mitali sa nag-unang 14 puntos sa Miami, niadtong tungora wala siya'y sipyat sa lima niya ka tira ug mitapos uban ang 23 puntos sa dihang gilat-an sa Heat ang Atlanta Hawks sa iskor nga 120-87 atol sa ilang pre-season game kagahapon didto sa American Airlines Arena sa Miami, Florida.
Sud sa tulo ka duwa sa pre-season, si Herro, ang No. 13 pick sa miaging NBA Draft, milansang og 18 sa 33 niya ka itsa aron pagtigum og 49 puntos.
"The kid can play," matud pa ni Heat assistant coach Malik Allen. "He has a confidence but he's a student of the game, he's smart, he's an extremely quick learner and you're seeing that."
Gawas ni Herro, impresibo sab ang gipakitang labok nilang Zion Williamson, ang No. 1 pick sa New Orleans Pelicans, Ja Morant, ang No. 2 pick sa Memphis Grizzlies ug RJ Barrett, ang No. 3 pick sa New York Knicks.
Si Zion mi-average og 23.3 points sa Pelicans, si Morant mikolekta og 23 ka asssists sud lamang sa tulo ka duwa, samtang si Barrett dunay average nga 16 point uban sa Knicks.
Nagparamdam sab dayon sa ilang presensiya sa NBA sila si No. 7 pick Coby White sa Chicago Bulls ug Jordan Poole sa Golden State Warriors.
- Latest
