7 SEAG gold wawalisin ni Yulo
MANILA,Philippines — Dahil sa kanyang pag-angkin sa gold medal sa men’s floor exercise ng katatapos na 49th FIG Artistic Gymnastics World Championships sa Stuttgart, Germany ay inaasahang wawalisin ni Filipino gymnast Carlos Edriel Yulo ang pitong events sa darating na 30th Southeast Asian Games.
Ngunit para magawa ito ay kailangang paghusayan ni Yulo ang kanyang performance sa pommel horse at parallel bars na nakaapekto sa kanyang tsansa sa gold medal sa all-around category ng nakaraang world championships.
“The Vietnamese perform well in those apparatuses. We don’t want to give them a chance,” sabi ni Gymnastics Association of the Philippines secretary general Bettina Pou kay Yulo.
Pitong events ang nakalatag sa men’s gymnastics competition na lalahukan ni Yulo sa 2019 SEA Games na nakatakda sa Nobyembre 30 hanggang Disyembre 11.
Ito ang unang pagkakataon na maglalaro ang 19-anyos na Pinoy gymnast sa SEA Games.
“While we’re hoping for a sweep, we won’t pressure him to go for it. All we want is for him to enjoy what he’s doing and have fun competing,” wika ni Pou kay Yulo. “We would tell Caloy to give the best he can and the victory would definitely follow.”
Ibinulsa ni Yulo ang gold medal sa men’s floor exercise para maging unang Pinoy na nagkampeon sa Gymnastics World Championships.
- Latest
