Pinay boxer kampiyon

CEBU, Philippines — Mihimo og kasaysayan sa Pilipinas ang Pinay'ng boxer nga si Nesthy Petecio human midaog og bulawang medalya sa 2019 AIBA Women's Boxing World Championships niadtong Domingo sa gabii didto sa Russia.

Gipilde ni Petecio ang mas taas nga si Liudmila Vorontsove pinaagi sa split decision atubangan sa mga Russian fans.

Sa wala pa niya gipilde si Vorontsove  sa finals, si Petecio mikulata una ni Karris Artingstall sa Britain sa semifinals. Tulo ka boksidor  ang gipangpilde ni Petecio sa elimination round nga silang Jucielen Romeu sa Brazil, Stanimira Petrova sa Russia ug Quia Jieru sa China.

Dominante sa tibuok sangka si Petecio diin   nakakuha siya og iskor  30-27, 30-27 gikan sa duha ka mga hurado, apan surprisa nga adunay laing duha ka judges  ang mihatag og 30-27, 29-28 pabor ni Vorontsove.

"Nesthy deserved the win not only because she fought brilliantly, but also because she sacrificed so much for this,"  matud pa ni Association of Boxing Alliances of the Philippines (ABAP) president Ricky Vargas sa ABS-CBN Sports.

Si Petecio mopahuway una og kadiyot sa dili pa mobalik sa training pangandam alang sa Southeast Asian Games sunod bulan.