Celtics, Pelicans padayong nanginit

CEBU, Philippines — Ang Boston Celtics ubos sa pagtimon ni Kemba Walker ug ang New Orleans Pelicans nga gibidahan ni Zion Williamson, padayong miarangkada sa NBA pre-season.

Ang Celtics mikulit sa ikatulo nilang sagunson nga daog human gilubong ang Cleveland Cavaliers sa iskor nga 118-72.

Si Max Strus mihipos og 14 puntos, samtang si Walker  adunay 12 puntos alang sa Celtics nga klaro na kaayong daog human mikadlit og 54 puntos nga labaw sa halftime.

Mikuha sa og atensiyon si Williamson, ang No. 1 overall pick sa miaging NBA Draft human kini mitali og 22 puntos aron pangulohan ang Pelicans ngadto sa 123-114 nga  kadaogan batok sa San Antonio Spurs sa iskor nga 123-114.

Miamot si Jrue Holiday og 16 puntos alang sa Pelicans nga madasigon nga mibangon human malubong og 17 puntos aron paludhon ang Spurs.

Sa laing duwa, sila si Montrezl Harrell ug Lou Williams nagkumbinar og 38 puntos sa dihang gipakaging sa LA Clippers ang Melbourne United sa iskor nga 118-100.

Sa uban pang mga resulta, ang Philadelphia 76ers milubong sa Orlando Magic, 126-94, ang Chicago Bulls misungag sa Toronto Raptors, 105-91, ang Milwaukee Bucks mipukan sa Washington Wizards, 115-108  ug ang Minnesota Timberwolves milubong sa Maccabi Haifa sa iskor nga 131-101.