Yulo, Petecio may pabuya sa PSC

MANILA, Philippines — Itinuring ni Philippine Sports Commission chairman William ‘Butch’ Ramirez na ‘historic day’ ang pag-angkin nina gymnast Carlos Edriel Yulo at boxer Nesthy Petecio sa sinalihang mga world championships.

Kaya naman nagbigay ang PSC ng cash incentives na karapat-dapat lamang na matanggap nina Yulo at Petecio.

“Based on RA 10699 or the Expanded Incentives Act, the PSC will give Caloy (Yulo) P500,000 plus another P500,000 for setting the historic mark,” sabi ni Ramirez kay Yulo na inangkin ang gold medal sa men’s floor exercise ng 49th Artistic Gymnastics World Championships sa Stuttgart, Germany.

“I met him several times, he visited us. Napaka-humble na bata. I think the whole of Leveriza must be prepared on Wednesday arrival.

Kasi sino ba maniniwala? A Filipino is a gymnast. Artistic gymnastics panalo ang isang Pinoy,” ani Ramirez sa tubong Maynila.

Nagbigay naman ang PSC kay Petecio ng P1 milyon na insentibo makaraang sumuntok ng gintong medalya sa AIBA Women’s Boxing World Championship sa Ulan-Ude, Buryatin, Russia.

Tinalo ng tubong Sta. Maria, Davao del Sur na si Petecio si Russian Liudmila Vorontsova sa gold medal round ng featherweight division.

Sina Yulo at Petecio ay nakatakdang bigyan ng welcome party ng sports commission ngayong gabi sa Century Park Hotel kasunod ang courtesy call kay Pangulong Rodrigo Duterte sa Malacañang bukas.

Maliban kina Yulo at Petecio, nagbigay din ang PSC kay boxer Eumir Marcial ng P500,000 dahil sa kanyang pagkolekta ng silver medal sa AIBA World Boxing Championships sa Ekatirinburg, Sverdlosk Oblast, Russia kamakailan.

Sina Yulo at pole vaulter Ernest John Obiena ang unang dalawang Pinoy athlete na nakakuha ng tiket para sa 2020 Olympic Games na gagawin sa Tokyo, Japan.

Kagaya nina 2016 Olympic Games silver medalist Hidilyn Diaz at Obiena, bibigyan din ng PSC ng mga coaches, psychologists, nutritionists at conditioning services si Yulo para sa paghahanda sa 2020 Tokyo Games.

“Ibubuhos talaga natin ang pera para sa kanila kasi kung titipirin mo sila walang mangyayari,” ani Ramirez kina Diaz, Obiena at Yulo.